Tramp: "Grenlandiya AQShga kerak, biz u yerni albatta olishimiz shart"

Grenlandiya Qo‘shma Shtatlar uchun xalqaro xavfsizlikni ta’minlash uchun zarur, Vashington uni olishi kerak.

Bu haqda AQSh prezidenti Donald Tramp ma’lum qildi.

"Bizga Grenlandiya xalqaro xavfsizlik uchun kerak. Bizga kerak. Biz uni olishimiz kerak. Va bu bizga mudofaa va hatto hujum pozisiyasi nuqtai nazaridan kerak bo‘lgan orol, ayniqsa hozirgi dunyo sharoitida. Va bizda bo‘lishi kerak. Men buni aytishni yoqtirmayman, lekin biz uni olishimiz kerak", - dedi davlat rahbari.

Qayd etish kerakki, Grenlandiya avtonom hudud sifatida Daniya tarkibiga kiradi. 1951 yilda Vashington va Kopengagen o‘zlarining NATO ittifoqidagi majburiyatlariga qo‘shimcha ravishda Grenlandiya mudofaa shartnomasini imzoladilar. Unga ko‘ra, Qo‘shma Shtatlar orolni agressiyadan himoya qilish majburiyatini oldi. Bu yerda raketa hujumidan ogohlantirish tizimi va Arktika zonasini boshqarish vazifalarini bajaradigan Amerikaning Pituffik kosmik bazasi joylashgan.

Tramp avvalroq bir necha bor Grenlandiya AQShga qo‘shilishi kerakligini aytgan edi. U Daniya oroldan voz kechmasa, unga yuqori savdo bojlari qo‘yish bilan tahdid qildi. Hatto birinchi prezidentlik davrida Tramp Grenlandiyani sotib olishni taklif qilgan. Daniya va Grenlandiya hukumati bu fikrni rad etgandi.