Tramp G‘azodagi urush tez orada yakunlanishini va’da qildi

AQSh prezidenti mojaroni yaqin orada tugashini kutmoqda, biroq Isroil hali ham sulh rejasini rad etmoqda.

AQSh prezidenti Donald Tramp Oq uyda bergan bayonotida G‘azodagi urush ikki-uch hafta ichida yakunlanishini aytdi. "O‘ylaymanki, yaqin ikki-uch hafta ichida ancha yaxshi, yakuniy yechim bo‘ladi", — dedi u, bu prognozining asoslarini ochiqlamasdan.

AQSh rahbari urushning “ochlik va o‘limlar” tufayli to‘xtatilishi zarurligini ta’kidladi.

Tramp AQShning "jiddiy diplomatik harakatlari"ni eslatib o‘tdi, biroq Isroil HAMAS tomonidan taklif qilingan so‘nggi rejani — 60 kunlik o‘t ochishni to‘xtatish va 10 nafar garovdagi shaxsni ozod qilish rejasini qabul qilmaganini ma’lum qildi. Buning o‘rniga Tel-Aviv G‘azo shahrini bosib olishga tayyorgarlik ko‘rmoqda, bu esa bir necha oy davom etishi mumkin.

Ayni paytda G‘azo sektori og‘ir gumanitar inqiroz holatida qolmoqda. Isroil tomonidan qo‘yilgan blokada va tinimsiz bombardimonlar ochlik, ichimlik suvi, dori-darmon va gigiyena vositalarining tanqisligiga olib keldi. 2023-yil 7-oktyabrdan buyon Isroil tajovuzi natijasida halok bo‘lganlar soni 62 744 kishiga, yaralanganlar esa 158 259 kishiga yetdi, ularning aksariyati ayollar va bolalardir.