Toshkentga bir dona elektrobus olib kelindi. Elektrobusni poytaxt jamoat transporti harakat tarkibida sinov tariqasida yurgizish rejalashtirilgan. Bu haqda “Toshshahartransxizmat” AJ matbuot xizmati xabar qiladi.
Kompaniya xabariga ko‘ra, ushbu jamoat transporti “Toshshahartransxizmat” AJ va Belarusning «Belkommunmash» kompaniyasi o‘rtasidagi o‘zaro memorandumga asosan keltirildi.
Bunga qadar elektrobusni yo‘nalishga chiqarish bilan bog‘liq tashkiliy ishlar amalga oshirildi. Xususan, 2 ta joyda elektrobusni quvvatlash shaxobchalari o‘rnatildi.
"Yaqin kunlarda elektrobus qisqa masofali yo‘nalishlardan biriga biriktiriladi. Maxsus komissiya ushbu elektrobus bilan bog‘liq barcha holatlarni to‘liq o‘rganib chiqadi. Xususan, O‘zbekistonning issiq iqlimida elektrobusning harakatlanish imkoniyatlari, yo‘lovchilar sog‘ligiga uning ta’siri va boshqa jihatlar atroflicha tahlil qilinadi", deyiladi xabarda.