Toshkentda 4 marotaba ma’muriy javobgarlikka tortilgan haydovchi piyodani urib yuborib voqea joyidan qochib ketdi

Joriy yilning 27 avgust kuni soat 23:45 larda, Toshkent shahar, Mirzo Ulug‘bek tumani, Parkent ko‘chasida joylashgan “Qurolli kuchlar akademiyasi” qarshisida haydovchi, 1993 yilda tug‘ilgan S.J. “Neksiya-3” rusumli avtomobilni boshqarib ketayotib, ushbu ko‘chada xizmat olib borayotgan YPXB Maxsus batalyon 2-safarbar guruxi inspektori D.Abdullayevning to‘xtash ishorasiga amal qilmasdan harakatini davom ettirib, KXAY-Parkent ko‘chalari chorrahasida xizmat olib borayotgan YPXB Maxsus batalyon inspektori SH.Tuklibayevning ham to‘xtash ishorasiga bo‘ysunmasdan harakatni davom ettirib, yuqori tezlikda harakatlanib, Parkent ko‘chasi 69-uy qarshisida tartibga solinmagan piyodalar yo‘lakchasidan o‘tayotgan piyodani urib yuborgan va YTH joyidan yashirinib, avtomobilni Toshkent viloyati, Qibray tumani, Gulbog‘ MFY, Gulbog‘ ko‘chasiga tashlab ketgan.

Joriy yilning 28 avgust kuni soat 13:00 larda, haydovchi S.J. o‘z aybiga iqror bo‘lib, IIBga murojaat qilib, YTH joyiga qaytib kelgan.

YTH natijasida, piyoda (shaxsiga aniqlik kiritilmoqda) yevropa millatiga mansub, yoshi taxminan 65-70 larda bo‘lgan erkak kishi olgan  tan  jarohatlari oqibatida YTH joyida vafot etgan.

Ma’lumot o‘rnida haydovchi S.J. bir yil mobaynida 4 marotaba ma’muriy javobgarlikka tortilgan.

Mazkur YTH yuzasidan Mirzo Ulug‘bek tumani IIO FMB huzuridagi TB tomonidan dastlabki tergov harakatlari olib borilmoqda.

"Barcha haydovchilardan tezlik me’yoriga amal qilishlarini, o‘zi va o‘zgalar hayotini xavf ostiga qo‘ymasliklarini so‘rab qolamiz", deyiladi O‘zbekiston Respublikasi IIV YHXBB Axborot xizmati xabarida.