Toshkent viloyatida Cobalt va Isuzu avtobusi to‘qnashib, yonib ketdi

Bugun, 4 noyabr kuni soat taxminan 07:00 larda Toshkent viloyati, Ohangaron tumanidagi avtomobil yo‘lida yo‘l-transport hodisasi sodir bo‘ldi.

Haydovchi D.B. boshqaruvidagi Cobalt avtomobili harakatlanayotgan vaqtda, yo‘lning mumkin bo‘lgan qismidan qayrilib olayotgan haydovchi O.D. boshqaruvidagi Isuzu rusumli avtobus bilan to‘qnashgan.

Hodisadan so‘ng transport vositalarida bo‘lgan fuqarolar avtomobil salonidan chiqarib olingan. Vafot etganlar yo‘q.

Bir ozdan so‘ng avtoulovlarda qisqa tutashuv yuz berib, yong‘in kelib chiqqan. Yong‘in hududiy Favqulodda vaziyatlar boshqarmasi xodimlari tomonidan bartaraf etilgan.

Yong‘in natijasida atrofdagi boshqa fuqarolarga zarar yetmagan.

Hozirda holat yuzasidan Ohangaron tumani IIB xodimlari tomonidan surishtiruv ishlari olib borilmoqda.