Ijtimoiy tarmoqlarda Surxondaryo viloyati, Sariosiyo tumanidagi umumta’lim maktab o‘qituvchilarining bir kunlik ish haqi Sardobaga, yana bir kunligi maktablarni ta’mirlash uchun o‘tkazilganligi haqida xabar tarqalgandi. Surxondaryo viloyati Xalq talimi boshqarmasi xabar yuzasidan quyidagilarni ma’lum qildi.
Mazkur holat Sariosiyo tumani xalq ta’limi bo‘limi mutaxassislari tomonidan o‘rganildi. Natijada tuman xalq ta’limi tizimida ishlaydigan xodimlar tashabbusi bilan ixtiyoriylik asosida Sirdaryo viloyatidagi suv to‘g‘onida yuz bergan baxtsiz hodisa oqibatlarini bartaraf etishga moddiy jihatdan ko‘maklashish maqsadida har bir hodimdan 10 000 mingdan 30 000 ming so‘mgacha pul mablag‘i yig‘ilib, bank orqali o‘tkazilganligi ma’lum bo‘ldi. Maktablarni ta’mirlash uchun esa o‘qituvchilarning ish haqidan pul ushlab qolinmagan.
Hozirda mazkur holat bo‘yicha Sariosiyo tuman prokuraturasi tomonidan surishtiruv harakatlari olib borilmoqda. Ushbu surishturuv yakunlanganidan keyin qo‘shimcha ma’lumot beriladi.