Surxondaryoda 12 ta do‘kon yonib ketdi

Denov tumani Bobur mahallasida joylashgan «Bek» MCHJga qarashli savdo majmuasi hududidagi 4 ta asosiy va 8 ta kichik savdo do‘konlarida 25 iyun tungi soat 02:12 da yong‘in sodir bo‘ldi. Bu haqda Surxondaryo viloyati hokimligi axborot xizmatiga tayanib, Bugun Uz nashri xabar tarqatdi.

Ma’lumotlarga ko‘ra, 90 kvadrat metr maydondagi buyum hamda kiyim-kechaklar yong‘indan zararlangan. Voqea joyiga Denov, Sho‘rchi, Oltinsoy, Sariosiyo va Qumqo‘rg‘on tumanlari FVBning 9 ta yong‘in-qutqaruv ekipajlari soat 02:20 da yetib borib, yong‘in soat 02:30 da qurshab olingan va soat 03:50 da batamom o‘chirilgan.

O‘t o‘chiruvchilarning sa’y-harakatlari natijasida majmua boshqa hududlariga yong‘in tarqalishining oldi olingan va 48 ta savdo do‘koni hamda 500 kvadrat metr maydoni saqlab qolingan. Yong‘in oqibatida tan jarohati olganlar yo‘q.