Sigaretalar tarkibiga talablar belgilanmoqda

Vazirlar Mahkamasining 18.05.2024 yildagi “Tamaki mahsulotlari uchun texnik reglamentni tasdiqlash to‘g‘risida”gi 290-son qaror qabul qilindi.

Hujjat bilan tamaki mahsulotlari uchun texnik reglament tasdiqlandi. U 2025 yilning 1 yanvaridan kuchga kiradi. Texnik reglament:

• eksport qilishga yoki respublika hududi orqali tranzit uchun mo‘ljallangan;
• yuridik shaxslar tomonidan ko‘rgazmali namunalar, sinovlar uchun namunalar sifatida sotish maqsadisiz olib kirilgan;
• jismoniy shaxslar, jumladan, chet el fuqarolari tomonidan o‘z ehtiyojlari uchun foydalanish va keyinchalik sotish maqsadisiz olib kirilgan tamaki mahsulotlari va tamakini hamda nikotinni iste’mol qilish moslamalariga nisbatan qo‘llanilmaydi.

Texnik reglament:

• xom ashyo va ingrediyentlar;
• tashish va saqlash;
• ishlab chiqarish;
• qadoqlash;
• tibbiy ogohlantirishlarga talablarni belgilaydi.

Hujjat tamaki mahsulotlari uchun kimyoviy va mikrobiologik moddalar miqdorining yo‘l qo‘yiladigan eng yuqori darajalarini belgilaydi.

Shuningdek, tamaki mahsulotlarining o‘ramida joylashtiriladigan tibbiy ogohlantirishlar namunalari tasdiqlanmoqda.

Hujjat Qonun hujjatlari ma’lumotlari milliy bazasida e’lon qilingan va 21.05.2024 yildan kuchga kirdi.