Shvesiyada o‘smirlar orasida zo‘ravonlik holatlarining ko‘payishi sababli rasmiylar jinoiy javobgarlik yoshini 15 yoshdan 13 yoshgacha tushirmoqchi. Bu haqda DW xabar berdi.
Shvesiya Bosh vaziri Ulf Kristersson og‘ir jinoyatlar uchun jinoiy javobgarlik yoshini 15 yoshdan 13 yoshgacha tushirishni rejalashtirmoqda.
Hukumat oktyabr oyida tegishli qonun loyihasini taqdim etdi.
“Stokgolm rasmiylari jinoiy guruhlar bilan bog‘liq halokatli jinoyatlarning ko‘payishiga munosabat bildiryapti. 15 yoshgacha bo‘lgan odamlar jinoiy javobgarlikka tortilishi mumkin emasligi sababli, tergovchilar jinoiy tarmoqlar bolalarni otishma va qurol savdosida ishtirok etish uchun tobora ko‘proq jalb qilayotganini aniqladilar”, - deb yozadi nashr.
Avvalroq, Shvesiya jinoyatchilikning ko‘payishi sababli voyaga yetmaganlar uchun qattiqroq jazolarni joriy qilishi haqida xabar berilgan edi. Yangi qonun loyihasida 13 va 14 yoshli bolalarni hibsxonalarda saqlash ko‘zda tutilgan.
Shvesiya Adliya vazirligining ma’lumotlariga ko‘ra, bunday muassasalar kelasi yozda voyaga yetmagan jinoyatchilarni qabul qila boshlaydi. Rasmiylar ushbu choralar jinoiy guruhlarning yashirin faoliyatining oldini olishga yordam berishiga umid qilmoqda.
