Rossiyaning «Gazprom» korporasiyasi Avstriyaga gaz etkazib berishni to‘xtatdi

Rossiyaning «Gazprom» korporasiyasi 16 noyabr kuni ertalab Avstriyaning OMV energetika kompaniyasiga gaz yetkazib berishni to‘xtatdi, dedi Avstriya kansleri Karl Nexammer. Sababi, 2022 yilda uzilgan etkazib berish bo‘yicha biznes mojarosi. Nexammer bir kun oldin mamlakat «shantaj qilinishiga yo‘l qo‘ymasligini» aytdi.

Avstriya Rossiya gazini «Shimoliy oqim» gaz quvuri orqali oldi. 2022 yilda Rossiyaning Ukrainaga to‘liq miqyosli bostirib kirishi fonida gaz ta’minotida uzilishlar yuzaga kela boshladi. Rossiya kompaniyasi buni texnik qiyinchiliklar bilan izohladi, G‘arb davlatlari Moskva ularni shantaj qilishga urinayotganini da’vo qilmoqda.

Avstriyaning OMV energetika kompaniyasi «Gazprom»ga qarshi Xalqaro savdo palatasiga da’vo arizasi bilan murojaat qilib, 243 million yevrodan ortiq tovon pulini qo‘lga kiritdi. OMV bu pulni joriy shartnoma uchun to‘lovdan ushlab qolishga qaror qildi, deb tushuntiradi DW.

Avvalroq OMV Rossiya gazini import qilishni to‘xtatishga tayyor ekanliklarini va uni Italiya, Germaniya va Niderlandiya hamda boshqa yetkazib beruvchilardan yetkazib berish bilan almashtirishga muvaffaq bo‘lishlarini ma’lum qilgan edi. DW ma’lumotlariga ko‘ra, Avstriya korporasiyasi 2040 yilgacha amalda bo‘lgan shartnomani buzish uchun Rossiya korporasiyasi bilan ataylab ziddiyatga kirishib, uni katta hajmdagi gaz sotib olishga majbur qilishi mumkin.

2024 yil iyun oyida Germaniyaning eng yirik gaz importchisi Uniper «Gazprom Eksport» bilan uzoq muddatli gaz yetkazib berish shartnomalarini bekor qilganini e’lon qildi. Shartnoma 2035 yilgacha amal qiladi. Stokgolm arbitraji Uniper'ning shartnomani bekor qilish va 2022 yil o‘rtalaridan boshlab yetkazib berilmagan gaz uchun kompensasiya sifatida «Gazprom»dan 13 milliard yevrodan ortiq mablag‘ talab qilish huquqini tan oldi, deb yozadi Current Time.