Rossiyalik milliarder Pyotr Aven sanksiyalar ostida o‘tayotgan hayoti haqida gapirdi

Rossiyalik milliarder Pyotr Aven Financial Times nashriga sanksiyalar ostida o‘tayotgan Buyuk Britaniyadagi hayoti haqida quyidagilarni so‘zlab berdi:

— Bizning biznesimiz sindi. 30 yil davomida nimagaki erishgan bo‘lsak, bari butunlay vayron bo‘ldi. Biz qandaydir tarzda yangi hayot boshlashimiz kerak;

— Biz qonuniy jihatdan biznes yurita olmaymiz. Ular [sheriklar] men bilan shaxsan uchrashishdan cho‘chiydi. Biz hokimiyatdan juda qo‘rqamiz;

— Men farrosh yoki haydovchi yollash huquqiga egamanmi? O‘zim hayday olmayman... Biz qanday qilib kun kechirishga ham o‘ylanib qoldik;

— Britaniyalik huquqshunoslar ruslar bilan ishlashni xohlamayapti. Menga joriy qilingan sanksiyalarni o‘zgartirish deyarli mumkin emasligi aytilmoqda;

— Faqat [Rossiya] prezident bilan uchrashgani uchun sanksiyalar ostida qolish juda g‘alati. Biz siyosatdan mutlaqo chetda qolishga harakat qilamiz. Putin bilan uchrashuvlarda men shaxsan emas, balki Alfa guruhi vakili bo‘lganman;

— Sanksiya qo‘llanilishi tushunarli. Lekin bu adolatdan emas. Biroq, insonlar halok bo‘layotgan bir paytda, men shikoyat qila olmayman.