Rossiyada o‘rtacha ish haqi ilk bor 100 ming rubldan oshib ketdi

2025 yil iyunida rossiyaliklarning o‘rtacha oylik maoshi 103 ming rubldan oshdi. Eng yuqori ish haqi tamakichilik va neft-gaz sohalarida qayd etildi.

Rossiya Federasiyasi Davlat statistikasi xizmati (Rosstat) ma’lumotlariga ko‘ra, 2025 yil iyunida o‘rtacha hisoblangan ish haqi 103 ming 183 rubl (bugungi kurs bilan 1280 AQSh dollari)ni tashkil etdi. Bu ilk bor o‘rtacha maosh 100 minglik chegarani bosib o‘tganini anglatadi. May oyida bu ko‘rsatkich 99,4 ming rubl edi. Yillik hisobda ish haqi 15 foizga o‘sgan, inflyasiya inobatga olinsa, real o‘sish 5,1 foizni tashkil etgan.

Rosstat hisobotiga ko‘ra, eng yuqori ish haqlari tamakichilik sanoatida (227,4 ming rubl), neft va gaz qazib chiqarish sohasida (208,7 ming), aviakosmik transportda (205,8 ming), moliya va IT sohalarida (186,5 va 173,8 ming rubl) qayd etilgan. Eng kam maosh tikish sexlari (50,5 ming), kuryer va pochtachilar (52,7 ming), charm mahsulotlari (59,8 ming), mebelsozlik (60,6 ming) hamda mehmonxona va umumiy ovqatlanish sohasida (61,7 ming rubl) ishlovchi xodimlarga to‘g‘ri kelmoqda.

Shu bilan birga, Rosstat ma’lumotlari asosan yirik va o‘rta biznes vakillarini qamrab oladi. Unda xususiy tadbirkorlar va kichik biznes ishchilari hisobga olinmaydi. Biroq tanlov umumiy mehnat bozorining yarmidan ortig‘ini qamrab olgani bois, ekspertlar uchun bu muhim ko‘rsatkich sanaladi. Iqtisodchi Sergey Aleksashenko bu ma’lumotni «Rosstat hisobotidagi eng e’tiborli jihat», deya ta’rifladi.

Maoshlar o‘sishi kadrlar tanqisligi saqlanayotganini anglatadi. Rossiya Banki ish bozorida keskinlik pasayishini qayd etgan bo‘lsa-da, bu hali to‘liq yengillashuv emas. Iyul oyi uchun ishsizlik darajasi tarixiy past ko‘rsatkich — 2,2 foiz bo‘lib qolmoqda. Ekspertlar ish bozorini hali ham «qizib turgan» deb baholamoqda.

Maoshlardan tashqari aholining haqiqiy daromadlari ham o‘smoqda, biroq daromadlar bo‘yicha notekislik kuchaymoqda. Joriy yilning birinchi yarmida haqiqiy ixtiyoriy daromadlar 7,8 foizga o‘sgan. Daromad bo‘yicha aholining eng kam 20 foiz qatlami ulushi 5,4 foizdan 5,3 foizga pasaygan bo‘lsa, eng boy 20 foiz qatlamniki 46,6 foizdan 46,9 foizga ko‘tarilgan. Jini koeffisiyenti 41,1 foizga yetgan, bu mamlakatda daromadlar bo‘yicha nomutanosiblik kuchayganini ko‘rsatadi.