Rossiyada ro‘yxatga olingan teraktlar soni keskin oshib ketdi

2024 yilda Rossiyada 1191 ta terrorchilik harakati qayd etilgan, bu avvalgi yilga nisbatan qariyb 3 barobar ko‘p (2023 yilda 410 ta holat).

Bu haqda "RBK" Rossiya Ichki ishlar vazirligi ma’lumotlariga tayanib xabar bermoqda.

Qayd etilishicha, terroristik jinoyatlarning umumiy soni ham sezilarli darajada oshgan – 2023 yildagi 2382 tadan 2024 yilda 3714 taga yetgan. Taqqoslash uchun, 2019 yildan 2023 yilgacha bo‘lgan davrda bu ko‘rsatkich barqaror bo‘lib, yiliga 2000 ga yaqin jinoyatni tashkil etgan.

2022 yildan buyon teraktlar sonining keskin o‘sishi qayd etilmoqda.2019-2021 yillarda har yili 40-50 ga yaqin, 2022 yilda – 127, 2023 yilda – 410, 2024 yilda esa 1000 dan ortiq shunday hodisalar qayd etilgan.

Terrorizmga oid moddalar bilan sudlanganlar soni ham ortgan. Rossiya Federasiyasi Jinoyat kodeksining 205-moddasi ("Terrorchilik harakati") asosiy moddasiga ko‘ra, 2024 yilda 75 kishi sudlangan. Shu bilan birga, oldingi besh yilda bunday jazo har yili 14 dan 43 tagacha chiqarilgan.