Rossiyada armiyadan qutulish yanada murakkablashmoqda

Rossiya Mudofaa vazirligi chaqiriluvchilarning sog‘liq holati tufayli harbiy xizmatdan ozod etilishini murakkablashtirmoqchi. Shartnoma tuzgan yoki safarbar etilgan shaxslar uchun xizmatdan bo‘shatish tartibi ham murakkablashtiriladi. Dushanba kuni "Ongli rad etuvchilar harakati" (ORH) bu taklifga e’tibor qaratdi.

Hujjatga ko‘ra, ayrim tashxislar "cheklangan darajada yaroqli" ("V" toifasi) toifasidan "kichik cheklovlar bilan yaroqli" ("B3") toifasiga o‘tkaziladi. Bu, masalan, gipertoniyaning birinchi bosqichi (yuqori qon bosimi) bo‘lgan chaqiriluvchilarga tegishli bo‘ladi.

ORH vakili Artyom Kliganing aytishicha, gipertoniya sababli chaqiruvdan qochish imkoniyati amalda yo‘qqa chiqishi mumkin. O‘zgarishlar gipotireoz, psoriaz, ekzema va ruhiy kasalliklarga chalingan chaqiriluvchilarga ham ta’sir ko‘rsatadi.

"Kommersant" gazetasi xabar berishicha, Rossiya Mudofaa vazirligi taklif qilayotgan o‘zgarishlar birlamchi, ikkilamchi va yashirin zaxm bilan kasallangan fuqarolarga "V" toifasi (cheklangan darajada yaroqli, tinchlik davrida chaqirilmaydi) o‘rniga "B4" toifasini berish imkonini yaratadi. Bu toifaga muhandislik va temir yo‘l qo‘shinlari, aloqachilar, texniklar va harbiy qo‘riqlash xizmati xodimlari kiradi.

Hujjatda, shuningdek, safarbarlik davrida (prezidentning tugatish to‘g‘risidagi farmoni yo‘qligi sababli rasman davom etmoqda), harbiy holat va urush vaqtida (ba’zi hududlarda, shu jumladan anneksiya qilingan hududlarda amal qilmoqda) chiqarilgan harbiy-tibbiy ekspertiza xulosalari alohida toifaga ajratiladi. Ushbu davrlarda chiqarilgan xulosalar ko‘rsatilgan davrlar tugaganidan so‘ng yana bir yil davomida o‘z kuchini saqlab qoladi.