Rossiya T-54/55 sovet tanklarini omborlardan qayta chiqardi

Conflict Intelligence Team (CIT) surishtiruv loyihasiga ko‘ra, Rossiya 40-50-yillarda ishlab chiqarilgan T-54/55 oilasiga mansub sovet tanklarini omborlardan qayta chiqarib olishni boshladi.

Loyiha ixtiyorida Uzoq Sharqdan harbiy texnika olib ketayotgan poyezd suratlari bor.

CIT ma’lumotlariga ko‘ra, T-54/55 tanklari bo‘lgan poyezd yaqinda Primore o‘lkasining 1295-Markaziy zaxira va tanklar bazasi joylashgan Arsenev shahridan jo‘nab ketgan.

Mutaxassislarning ta’kidlashicha, T-54’ning birinchi modifikasiyalari sovet armiyasi tomonidan 1940-yillarning ikkinchi yarmida, T-55 esa 1958 yilda qabul qilib olingan.

«Biz ushbu tanklar nima maqsadda qo‘llanilishi mumkinligiga aniq javob berishda qiynalyapmiz, ammo har qanday holatda ham, BTR-50 omborlardan olib chiqilishi va MT-LB’ga kema zenit qurollarini o‘rnatish bilan bir qatorda, bu Rossiya Qurolli kuchlarini zirhli transport vositalari bilan ta’minlashga oid jiddiy muammolarni aniq ko‘rsatmoqda», deyiladi CIT bayonotida.