Rodri «Oltin to‘p»ga Vinisius loyiqligini aytgan Ronalduga javob qaytardi

Rodri Krishtianu Ronalduning «Oltin to‘p» haqidagi so‘zlariga izoh berdi.

«Manchester Siti» yarimhimoyachisi o‘tgan mavsum yakunida France Football talqiniga ko‘ra mavsumning eng yaxshi futbolchisiga atalgan sovrinni qo‘lga kiritgandi.

— Krishtianu Ronalduning «Oltin to‘p» haqidagi so‘zlariga qanday fikrdasiz? U sizning g‘alabangizni shubha ostiga qo‘ydi va Vinisius mukofotga loyiq ekanligini aytdi.

— Rostini aytsam, bu ajablantirdi. Chunki u bu mukofot qanday ishlashini va g‘olib qanday tanlanishini hammadan yaxshi biladi. Ovoz berishda qatnashgan jurnalistlar ushbu sovringa men loyiqligim borasida qaror qilishdi.

Aynan o‘sha jurnalistlar qachondir unga ovoz berishgan bo‘lsa kerak, menimcha, Krishtianu o‘shanda natijalardan rozi bo‘lgan, — deya Rodrining so‘zlarini keltiradi AS.