21 sentyabr kuni II Xalqaro hunarmandlar festivali dasturi doirasida Rishton tumanida Xalqaro hunarmandchilik muzeyining tantanali ochilish marosimi bo‘lib o‘tdi. Unda xorij ustalarining kulolchilik, kashtachilik, yog‘och o‘ymakorligi va boshqa yo‘nalishdagi qo‘l mehnati namunalari namoyish etildi.
Muzeydan 40 dan ortiq mamlakat hunarmandlari tomonidan yaratilgan noyob asarlar joy olgan.
Davlatimiz rahbari tomonidan qadimiy va boy an’analarga ega tariximiz, milliy o‘zligimiz ramzi bo‘lgan hunarmandchilik sohasini rivojlantirishga alohida e’tibor qaratilmoqda. Bugungi kunda milliy hunarmandchilik, xalq ijodiyoti va amaliy san’atini rivojlantirish uchun keng imkoniyatlar yaratilib, bu esa xalqimizning boy madaniy merosi va tarixiy an’analarini saqlashga xizmat qiladi.
