Mo‘g‘ulistonning Meteorologiya va atrof-muhit monitoringi instituti seshanba kuni qor bo‘roni haqida ogohlantirish e’lon qildi, deya xabar beradi Sinxua axborot agentligi.
Sinoptiklarning ma’lumotlariga ko‘ra, 8 oktyabrga o‘tar kechasidan g‘arbiy, markaziy va Gobi viloyatlarida, 9 oktyabrda esa mamlakatning sharqiy viloyatlarida qor bo‘roni esib, keyin Mo‘g‘ulistonning aksariyat hududlarida qor yog‘adi.
Shamol tezligi 14-16 m/s gacha kuchayishi kutilmoqda.
Meteorologiya va atrof-muhit monitoringi instituti Ulan-Bator aholisini qor bo‘roni va qishloq joylarda yo‘l ko‘rinmasligi sababli hududlarga chiqmaslikka, mo‘g‘ulistonlik ko‘chmanchi chorvadorlarni esa yaylovlarda chorva boqishda hushyor va ehtiyotkor bo‘lishga chaqirdi.