«London Chess Classic». Nodirbek Abdusattorov ketma-ket 3 ta g‘alabadan keyin yakka peshqadamga aylandi

Angliyadagi «London Chess Classic» turnirida kecha 4-tur o‘yinlari o‘tkazildi. Unda ishtirok etayotgan o‘zbekistonlik grossmeyster Nodirbek Abdusattorov ilk turda durang o‘ynab, ikkinchi turda g‘alaba qozongani haqida ma’lumot berib o‘tgandik.

Hamyurtimiz uchinchi va to‘rtinchi turlarni qora donalarda o‘tkazdi. Shunga qaramay, u mezbonlarning ikki a’zosini mag‘lub etdi. Dastlab Nikita Vityugov taslim etilgan bo‘lsa, kecha esa Maykl Adams 31 yurishda mag‘lub etildi.

Nodirbek 3,5 ochko bilan yakka peshqadam bo‘lib turibdi. Ikkinchi o‘rindagi Alirizo Firuzja hisobida 3,0 ochko mavjud. 2,5 ochko bilan kuchli uchlikka kirgan Nikolas Teodoru (Gresiya) bugun Abdusattorovga raqiblik qiladi. O‘yin Toshkent vaqti bilan 21:00 da start oladi.