Livan va Suriya chegarasidagi asosiy o‘tish punktiga Isroil hujum qilmasligi bo‘yicha kelishuvga erishildi

Isroil harbiylari Suriya va Livan o‘rtasidagi eng muhim chegara punkti — "Masnaa" nazoratini nishonga olishdan tiyilishga rozi bo‘lishdi. Bu Livan tomonining AQSh orqali amalga oshirgan vositachilik harakatlari natijasida erishildi.

Avvalroq, Isroil mudofaa kuchlari ushbu maskan orqali "Hizbulloh" guruhiga qurol-yarog‘ yetkazilayotganini da’vo qilib, yaqin vaqt ichida u yerga zarba berilishi haqida ogohlantirgan edi. Biroq Livan Bosh vaziri Navaf Salam Suriya va AQSh vakillari bilan muzokaralar olib borib, mazkur o‘tish punktiga hujum qilinmasligi bo‘yicha kafolatlar olgan. "Masnaa" punkti Livandagi urushdan qochib Suriyaga o‘tayotgan fuqarolar uchun asosiy yo‘l hisoblanadi.

Hozirda chegara hududi vaqtincha yopiq qolmoqda, ammo diplomatik kelishuv tufayli infratuzilmani vayron qilmaslikka kelishilgan. Isroil tomoni hozircha Reuters agentligining bu boradagi so‘rovlariga rasmiy munosabat bildirgani yo‘q, deyiladi xabarda.