Ko‘kdala tumanida “gaz zapravka”dagi portlashda 4 kishi halok bo‘ldi

Bugun, 16 iyul kuni Qashqadaryo viloyati Ko‘kdala tumanida joylashgan avtomobillarga gaz quyish shoxobchasida yirik yong‘in sodir bo‘ldi. Favqulodda vaziyatlar vazirligi hodisa oqibatlari yuzasidan qo‘shimcha ma’lumot berdi.

Qayd etilishicha, soat 14:40 da Ko‘kdala tumani, «Oltindala» MFYda joylashgan aholiga gaz to‘ldirish stansiyasi hududida yoqilg‘i saqlash rezervuarida chaqnash va undan so‘ng yong‘in kelib chiqqanligi bo‘yicha FVBga xabar kelib tushgan.

Shundan so‘ng, 4 ta yong‘in-qutqaruv ekipaji soat 14:45 da voqea joyiga yetib borib, yong‘in soat 15:00 da o‘rab olingan va soat 15:35 da to‘liq o‘chirilgan.

Xabarda texnogen avariya sabablari haqida ma’lumot berilmagan.

Hodisa oqibatida 4 nafar fuqaroning halok bo‘lgan.

Voqea joyiga FVB, IIB, SSB, prokuratura va boshqa tegishli tashkilotlar xodimlari yetib borgan.