Eronda 6 martdan beri qo‘lbola araqdan vafot etganlar soni 180 nafarga yetdi, deya xabar bermoqda ISNA agentligi.
Fors viloyati favqulodda vaziyatlar boshqarmasi boshlig‘i Muhammad Javod Murodiyonning ma’lum qilishicha, birgina mazkur viloyatda 6 martdan beri 427 kishi soxta spirtli ichimliklardan zaharlangan. Ulardan 65 nafari vafot etgan, 14 nafari reanimasiyada qolmoqda.
«Afsuski, bunday noxush holatga alkogolning koronavirusga dori ekani haqida ijtimoiy tarmoqlarda tarqagan mish-mishlar sabab bo‘ldi», – deydi u.
Oxirgi kunlarda Fors viloyatida o‘tkazilgan nazorat tadbirlarida 50 ming tonna alkogol olib qo‘yilgan, qo‘lbola araq ishlab chiqarish va tarqatish bilan shug‘ullanganlar qo‘lga olingan.
