Oq uyning strategik aloqalar bo‘yicha koordinatori Jon Kirbi Isroilning Eronga zarba berishga tayyorgarligi haqidagi o‘ta maxfiy ma’lumotlar oshkor etilganidan xavotir bildirdi.
"Biz har qanday maxfiy ma’lumotlarning keng jamoatchilik qo‘liga tushishidan chuqur xavotirdamiz. Prezident Jo Bayden ham bundan xavotirda. Bunday bo‘lmasligi kerak, bu kabi holatlarni qabul qilib bo‘lmaydi", — deya izoh berdi Kirbi matbuot anjumanida.
15 va 16 oktyabr sanalariga tegishli hujjatlar 18 oktyabr kuni internetda tarqala boshladi. CNN ma’lumotlariga ko‘ra, ular “o‘ta maxfiy” deb tasniflangan va bu ma’lumotlarni faqat AQShdan tashqari, Kanada, Yangi Zelandiya, Buyuk Britaniya va Avstraliyani o‘z ichiga olgan “Besh ko‘z” razvedka alyansi a’zolari ko‘rishi mumkinligi qayd etilgan.
