Janubiy Xitoy dengizida Filippin kemasini ta’qib qilayotgan ikkita Xitoy kemasi to‘qnashib ketdi

Janubiy Xitoy dengizidagi Xuan’yan oroli (Skarboro rifi) yaqinida Filippin kemasini ta’qib qilayotgan Xitoy qirg‘oq qo‘riqlash xizmati kesuvchisi Xitoy harbiy-dengiz kuchlari kemasi bilan to‘qnashib ketdi.

Bu haqda Manila Bulletin nashri xabar berdi.

Filippin qirg‘oq xavfsizlik xizmati jamoatchilik bilan aloqalar bo‘limi xodimi Jey Tarriyela aniqlik kiritishicha, hodisa insonparvarlik missiyasi chog‘ida sodir bo‘lgan. Filippin kemalari bahsli rifda baliqchilarga gumanitar yordam tarqatayotganda, ular Xitoy kemalari tomonidan “xavfli manevrlar va blokada”ga duch kelishdi.

Xitoy qirg‘oq qo‘riqlash xizmati kesuvchisi suv to‘pidan foydalanib, Filippin kemasini ta’qib qilgan. Ta’qib paytida u kutilmaganda Xitoyning kattaroq harbiy kemasi bilan to‘qnashib, ikkalasiga ham zarar yetkazgan.

May oyida Xalq Ozodlik Armiyasi (XXQ) janubiy zona jangovar qo‘mondonligi matbuot kotibi Tyan Junli Xitoy harbiylari Pekin va Manila o‘rtasidagi hududiy bahs mavzusi bo‘lgan Xuan’yan oroli (Skarboro rifi) suvlariga Filippin patrul katerining kirib kelishining oldini olishga muvaffaq bo‘lganini ma’lum qilgan edi.

U Xitoy harbiylarining harakatlarini professional va qonuniy deb baholadi.