Isroilga "zudlik bilan askarlar kerak"

Isroil armiyasi bir necha frontlarda davom etayotgan qariyb uch yillik urushdan so‘ng shaxsiy tarkibning keskin yetishmovchiligini boshdan kechirmoqda va qo‘shimcha kuchlarga muhtoj. Bu haqda Isroil Mudofaa armiyasi (SAXAL) Bosh shtabi boshlig‘i Eyal Zamir Knessetning Tashqi ishlar va mudofaa qo‘mitasidagi chiqishida ma’lum qildi, deb xabar bermoqda Ynet.

Zamirning ta’kidlashicha, Isroil armiyasi Eronga qarshi harbiy harakatlarni davom ettirishga tayyor, biroq u hozirgi kunda muntazam va zaxiradagi qo‘shinlar zimmasiga tushayotgan yuklama haddan tashqari yuqori ekanligidan ogohlantirdi. «Men bir necha frontda urush olib boryapman va dushmanni tor-mor qilyapman. Buni davom ettirish uchun SAXALga zudlik bilan yangi askarlar kerak», — dedi Zamir.

Bosh shtab boshlig‘i, shuningdek, ultraortodoksal yahudiylar — haredimlarni majburiy harbiy xizmatga jalb qilish, shuningdek, Isroil Mudofaa armiyasini kengaytirishga qaratilgan boshqa qonunlarni qabul qilish zarurligini ta’kidlamoqda.