— Buvim uyini menga hadya qilgan. Hozir u yerda amakilarim yashaydi. Hadya qilingan uy avtomatik ravishda hadya oluvchining nomiga o‘tadimi yoki buning uchun notariusga murojaat qilish kerakmi? Agar amakim qarshi bo‘lsa-chi, qanday yo‘l tutishim mumkin?
Ismi sir tutildi.
Dilfuza Dadadjanova, fuqarolik ishlari bo‘yicha Mirzo Ulug‘bek tumanlararo sudi sudyasi:
— Mulk egasi o‘zining mol-mulkidan o‘z xohishi bilan foydalanishi va uni tasarruf etishi, boshqalardan o‘zining mulk huquqining buzilishini bartaraf etishdan talab qilish huquqiga ega.
Fuqarolik kodeksining 502-moddasida hadya shartnomasi tarifi keltirilgan bo‘lib, unga muvofiq mulkdor (hadya qiluvchi) boshqa shaxsga (hadya oluvchi) ga o‘ziga tegishli bo‘lgan ashyoni tekinga mulk qilib beradi yoki berish majburiyatini oladi. Agar hadya shartnomasi predmeti ko‘chmas mulk bo‘lsa, ushbu shartnoma albatta notarial tasdiqlangan bo‘lishi va davlat ro‘yxatidan o‘tkazilishi lozim.
Bunday talablar bajarilgan vaqtdan boshlab, hadya qilingan uy-joy hadya oluvchining egaligiga o‘tadi. Aksincha, notarial tartibda rasmiylashtirilmagan va davlat ro‘yxatidan o‘tkazilmagan turar joyning hadya shartnomasi tuzilmagan deb hisoblanib, hadya oluvchining egaligiga o‘tmaydi va u mulk egasi hisoblanmaydi. Sizning holatingizda, buvingiz o‘ziga tegishli bo‘lgan uy-joyni nabirasiga, ya’ni sizga hadya qilgan bo‘lsa, hadya shartnomasi yozma ravishda tuzilib, xususiy amaliyot bilan shug‘ullanuvchi notarius tomonidan tasdiqlangan bo‘lishi va reestrga ro‘yxatga olinishi, shuningdek kadastr xizmatlari agentligidan davlat ro‘yxatidan o‘tkazilishi lozim. Shundagina ushbu uy-joy amalda sizning egaligingizga o‘tadi va uyga nisbatan mulk huquqi vujudga keladi.
