Futbol: 2030 va 2034 yillarda Jahon chempionatiga mezbonlik qiladigan mamlakatlar aniqlandi

Kecha, 11 dekabr kuni Shveysariyaning Syurix shahrida Xalqaro futbol federasiyasi (FIFA)ning navbatdan tashqari kongressi bo‘lib o‘tdi. Unda tashkilotga a’zo jami 211 ta assosiasiya to‘plangan.

Tashkilot kongressida 2030 yilgi mundial bir vaqtning o‘zida olti mamlakat - Marokash, Ispaniya, Portugaliya, Argentina, Urugvay va Paragvayda o‘tishi belgilandi.

Ushbu musobaqaning faqat birinchi uchta o‘yini Urugvay, Argentina va Paragvayda bo‘lib o‘tadi. Qolgan barcha o‘yinlar Marokash, Portugaliya va Ispaniyada o‘tkaziladi.

Aslida, 2030 yilgi jahon birinchiligining haqiqiy mezbonlari Marokash, Portugaliya va Ispaniya. Argentina, Urugvay va Paragvaydagi o‘yinlar futbol bo‘yicha Jahon chempionatlari o‘tkazila boshlanganiga 100 yil to‘lishi sharafiga uyushtiriladi.

Saudiya Arabistoni esa 2034 yilgi Jahon chempionatiga mezbonlik qiladigan bo‘ldi. Bahslar mamlakatning Ar-Riyod, Jidda, Abxa, Al-Xubar va Neom shaharlaridagi 15 ta stadionda o‘tkazilishi rejalashtirilmoqda.

Ma’lumot uchun, avvalroq, Avstraliya 2034 yilgi Jahon chempionatini o‘tkazishga da’vogar bo‘lgan. Biroq, yakunda tegishli hujjatlarni topshirishdan voz kechgan.

Eslatib o‘tamiz, 2026 yilgi futbol bo‘yicha Jahon chempionatiga AQSH, Kanada va Meksika mamlakatlari mezbonlik qiladi va chempionat o‘sha yilning 11 iyun - 19 iyul kunlari bo‘lib o‘tadi.