"Falastinliklarni emas, isroilliklarni ko‘chirib yuborishga harakat qiling - ularni Grenlandiyaga olib boring" - Eron tashqi ishlar vaziri

Abbos Arag‘chi Trampning G‘azodagi falastinliklarni "tozalash" taklifini masxara qilib, Sky News nashriga bergan intervyusida buning o‘rniga isroilliklarni Grenlandiyaga yuborish kerakligini aytdi.

"Mening taklifim boshqacha. Falastinliklar emas, isroilliklarni ko‘chirib yuborishga harakat qiling - ularni Grenlandiyaga olib boring, shunda bir o‘q bilan ikki quyonni urishlari mumkin," - dedi Eron tashqi ishlar vaziri.

Tramp noyabr oyidagi saylovda g‘alaba qozonganidan beri Grenlandiyani AQShning bir qismiga aylantirishga qiziqish bildirmoqda va Daniyaning bu muxtor hududini o‘z mamlakatining milliy xavfsizligi uchun juda muhim deb hisoblaydi.

Intervyuda Arag‘chi, shuningdek, Eronning mintaqaviy ittifoqchilari Isroil bilan bo‘lgan janglarda zaiflashganini tan oldi, biroq ular hamon o‘z o‘rnida turibdi, deb ta’kidladi.

"Hamas va Hizbulloh zarar ko‘rdi. Ammo shu bilan birga, ular o‘zlarini qayta tiklamoqdalar, chunki men aytganimdek, bu fikrlash maktabi, bu g‘oya, bu sabab, bu har doim mavjud bo‘ladigan ideal," - dedi u Sky News'ga.