Eronning javobi Isroilning xatti-harakatlariga bog‘liq

Eron prezidenti Masud Pezeshkian Tehrondagi vazirlar mahkamasi yig‘ilishida so‘zlagan nutqida Eron har qanday hujumga javob berishini aytdi. Biroq, u javob darajasi va shakli Isroilning pozisiyasiga bog‘liq bo‘lishi mumkinligini ta’kidladi. Uning so‘zlariga ko‘ra, agar Isroil harbiy harakatlarni to‘xtatib, sulhga rozi bo‘lsa, Eron cheklangan reaksiya ehtimolini ko‘rib chiqishga tayyor.

Pezeshkyan mintaqada agressiya bilan bog‘liq vaziyat kuchayib borayotganini ta’kidladi. Uning eslatishicha, Qo‘shma Shtatlar va Yevropa yetakchilari Eron Tehronda Xamas yetakchisi Ismoil Haniyaning o‘ldirilishi uchun o‘ch olishdan tiyiladigan bo‘lsa, G‘azoda sulh tuzishga tayyorligini ma’lum qilgan.

«Hukumatimizning birinchi kunidayoq Haniyaga suiqasd uyushtirib, urush qo‘zg‘atmoqchi bo‘lgan sionistik rejim edi. Biz ba’zi davlatlar maslahatiga ko‘ra, sulh o‘rnatish, begunoh ayollar va bolalar o‘ldirilishini to‘xtatish umidida vazminlik ko‘rsatgan bo‘lsak ham, Isroil o‘z jinoyatlarini yanada kuchaytirdi», — dedi Pezeshkyan.

Avvalroq Eron oliy rahnamosi Ali Xomanaiy Isroil va AQShni Eron va uning ittifoqchilariga qarshi hujumlari uchun «zararli javob» bilan tahdid qilgan edi.

«Dushmanlar, xoh sionistik rejim [Isroil] bo‘lsin, xoh Qo‘shma Shtatlar bo‘lsin, Eron, Eron xalqi va qarshilik frontiga qarshi harakatlari uchun albatta qattiq javob oladi», dedi Xomanaiy Eron davlat matbuoti tomonidan tarqatilgan videomurojaatda.

Eslatib o‘tamiz, 26-oktabrga o‘tar kechasi Isroil Eron harbiy ob’ektlariga raketa hujumi uyushtirgan edi. OAV ma’lumotlariga ko‘ra, ballistik raketa dasturining asosiy qismlari shikastlangan va Rossiyaning uchta S-300 zenit-raketa kompleksi yo‘q qilingan. Isroil hujumi 1-oktabr kuni Isroilga uyushtirilgan ommaviy hujumga javoban bo‘lib, Eron 200 ballistik raketani uchirdi. Eronning 1-oktabrdagi hujumi, o‘z navbatida, Tehronning Suriyadagi Eron diplomatik vakolatxonasiga qilingan hujumga javobi bo‘ldi.

Eron tomoni raketa ishlab chiqarishga yetkazilgan zarar haqidagi ma’lumotlarni rad etadi. Parlament komissiyasi a’zosi Abolfazl Zohrevandning aytishicha, havo hujumidan mudofaa tizimlari Isroilning deyarli barcha qiruvchi va uchuvchisiz uchoqlarini urib tushirgan. Ayni paytda IRNA agentligi to‘rt nafar eronlik harbiy halok bo‘lganini tasdiqladi.