Dubayni tark etish taqiqlangan o‘zbekistonlik bolaga vatanga qaytishiga yordam berildi

O‘zbekiston diplomatlari chet elda og‘ir ahvolga tushib qolgan o‘zbekistonliklarni vatanga qaytarishda yordam ko‘rsatdi. Bu haqda “Dunyo” axborot agentligi xabar berdi.

Xususan, O‘zbekiston Bosh konsulxonasi ko‘magida Dubaydagi “Al Rashid” shifoxonasida qiyin ahvolga tushib qolgan va konsullik-huquqiy yordamiga muhtoj bo‘lgan fuqaro qaytarilgan.

U sog‘lig‘ida kuzatilgan muammolardan shikoyat qilib, “Al Rashid” shifoxonasiga yotqizilgan. Muolaja davomida u 17 ming 835 AQSh dollari va BAA hududida uzrli sabab bilan bo‘lsa-da, noqonuniy qolgani uchun 4 ming 550 AQSh dollari miqdorida qarz bo‘lgan. Shu sababli O.K.ga mazkur shifoxona va BAAni tark etish uchun taqiq qo‘yilgan.

Vujudga kelgan muammoni yaqindan o‘rganish va bartaraf etish maqsadida diplomatlar “Al Rashid” shifoxonasi hamda BAA huquqni muhofaza qiluvchi organlari vakillari bilan muzokara olib borgan. Buning natijasida BAA tomoni ushbu fuqaroning barcha qarzlaridan voz kechgan va O‘zbekistonga qaytishiga ruxsat berilgan.

Bosh konsulxona va amirliklardagi “Ayollar va bolalarga yordam ko‘rsatish markazi” xayriya tashkiloti tomonidan O.K.ga Dubay—Toshkent aviaqatnoviga chipta sotib olinib, 15 noyabr kuni sog‘-salomat O‘zbekistonga qaytarilgan.

Bundan tashqari, Sibir poytaxtida og‘ir hayotiy vaziyatga tushib olgan o‘zbekistonlik oila mamlakat Bosh konsulxonasi ko‘magida O‘zbekistonga qaytarildi. Novosibirskda bo‘lgan er-xotin farzandining hujjatlari bilan bog‘liq muammolari tufayli vatanga qayta olmagan.

Rossiya tomonidan zarur hujjatlarni olish uchun barcha imkoniyatlar ishga solindi. Natijada bola va uning hujjatlari aeroportda ota-onasiga topshirilgan. Bola uchun barcha hujjatlar Bosh konsulxona sa’y-harakatlari bilan Rossiya tomonidan bir necha soat ichida tayyorlab berilgan.

Ushbu oila 22 noyabr kuni Rossiyaning “S7” aviakompaniyasi samolyoti bilan O‘zbekistonga qaytarilgan.