"Britaniya hukumati Ukrainaga uskunalarni ta’mirlash va harbiy reabilitasiya markazini tashkil etish uchun 50 million funt sterling (taxminan 65 million dollar) miqdoridagi yangi yordam paketini taqdim etishini aytdi", — deb xabar bermoqda Reuters.
Tafsilotlari Vilnyusdagi NATO sammitida muhokama qilinadigan paket doirasida Buyuk Britaniya va G7 mamlakatlari Challenger 2 tanklari va 70 dan ortiq jangovar va logistika vositalari uchun Ukrainani qo‘shimcha minglab o‘q-dorilar bilan ta’minlaydi.
Dastur NATOning Ukrainaga keng qamrovli yordam paketi tomonidan moliyalashtiriladi va alyansning barcha mamlakatlari mutaxassislari tomonidan qo‘llab-quvvatlanadi, deyiladi Britaniya hukumati bayonotida.
G7ning barcha a’zolari qo‘shma deklarasiyani imzolashi kutilmoqda. Hujjat yaqin yillarda ittifoqchilarning Ukrainani qanday qo‘llab-quvvatlashini belgilaydi.
"Ukrainaning NATOga a’zo bo‘lish yo‘lidagi taraqqiyotini qo‘llab-quvvatlash, rasmiy, ko‘p tomonlama va ikki tomonlama kelishuvlar hamda NATO a’zolarining qo‘llab-quvvatlashi Prezident Putinga kuchli xabar yuboradi, shuningdek Yevropaga tinchlikni qaytaradi", — deya ta’kidladi Britaniya Bosh vaziri Rishi Sunak.
