Buyuk Britaniya Chernobil atom elektr stansiyasini ta’mirlash ishlari uchun Ukrainaga 22,4 million dollar miqdorida moliyaviy yordam ajratadi.
Bu haqda 14 oktyabr kuni Britaniya hukumati rasmiy saytida e’lon qilingan xabarda ma’lum qilindi.
Qayd etilishicha, ajratiladigan mablag‘lar, jumladan, atom elektr stansiyasidagi himoya inshootining ventilyasiya tizimini tiklash hamda uning foydalanish muddatini uzaytirishga yo‘naltiriladi.
Britaniya rasmiylari ta’mirlash ishlarini o‘z vaqtida amalga oshirish muhimligini ta’kidlagan.
Ularning ogohlantirishicha, zarur ta’mirlash ishlari bajarilmasa, korroziya jarayonlari xalqaro hamjamiyatning ko‘p yillik sarmoyalari natijasida erishilgan yutuqlarni yo‘qqa chiqarishi mumkin.
Bunday vaziyat uzoq muddatli ekologik tahdidlarni yuzaga keltirishi, shuningdek, xavfsizlik bilan bog‘liq jiddiy xatarlarga sabab bo‘lishi ehtimoli bor.