"Brayton" muxlisi Falastin libosini kiygani uchun 5 ta uy o‘yiniga kiritilmaydigan bo‘ldi

"Brayton" muxlisining aytishicha, u Falastinning liboslarini kiygani uchun 5 ta o‘yinga diskvalifikasiya qilingan.

"Brayton" o‘yinlariga mavsumiy abonement egasi va "Boxfresh" poyabzal brendini yaratgan Rojer Ueydning aytishicha, klub uni Falastin atributikasi uchun jazolagan.

APL 1-turida "Brayton" o‘z maydonida "Vulverxempton" bilan durang o‘ynadi (1:1). O‘yin davomida Ueydni stadionni tark etishga majburlashdi.

Yozma so‘rovga javoban klub unga o‘yinda Falastin terma jamoasi libosini kiygani tufayli keyingi 5 ta o‘yinga borishi taqiqlangani haqida xabar yubordi.

Avvalroq Buyuk Britaniya bosh vaziri Kir Starmer mamlakat sentyabr oyida BMT Bosh assambleyasi sessiyasida Falastin davlatini tan olishi mumkinligini aytgandi.

Agar Isroil G‘azo sektoriga gumanitar yordam yuborish bo‘yicha aniq choralar ko‘rmasa va ikki davlat to‘g‘risidagi qarorga sodiqligini tasdiqlamasa, bu sodir bo‘ladi.