BMT: 2024 yilda 60 dan ortiq OAV xodimlari halok bo‘ldi

2024 yilda 60 dan ortiq jurnalist va ommaviy axborot vositalari xodimlari o‘z xizmat vazifalarini bajarish chog‘ida halok bo‘ldi.

Bu haqda BMTning Inson huquqlari bo‘yicha Oliy komissari Volker Turk hisobotida aytiladi. BMT Yaqin Sharqni jurnalistlar uchun eng xavfli joylardan biri deb atadi.

BMT Inson huquqlari bo‘yicha komissarining hisoboti joriy yilning birinchi olti oyi davomida olingan ma’lumotlarga asoslangan. Statistik ma’lumotlarga ko‘ra, 61 nafar jurnalist tahririyat topshirig‘ini bajarish chog‘ida halok bo‘lgan.

«Hukumatlar hujumlarning oldini olish, jurnalistlarni himoya qilish va jinoyatchilarni javobgarlikka tortish uchun ko‘proq harakat qilishi kerak. Davlatlar ham so‘z va axborot erkinligini himoya qiluvchi qonunlarga muhtoj», — deyiladi hisobotda.

Bundan tashqari, hujjatda jurnalistlarning kasbiy risklari ham qayd etilgan. Masalan, ayol jurnalistlar onlayn zo‘ravonlik qurboni bo‘lish yoki jismoniy zo‘ravonlikdan aziyat chekish xavfi yuqori. YUNESKO ma’lumotlariga ko‘ra, jurnalistlarga qarshi jinoyatlarning 86 foizi jazosiz qolmoqda.

2023 yilda dunyo bo‘ylab 99 nafar jurnalist va ommaviy axborot vositalari xodimlari o‘ldirilgan. Jurnalistlarni himoya qilish qo‘mitasi (CPJ) hisobotiga ko‘ra, bu 2015 yildan beri eng yuqori o‘lim va 2022 yilga nisbatan deyarli 44 foizga ko‘p. Ularning aksariyati Yaqin Sharqda kuchayib borayotgan mojarolar natijasida halok bo‘lgan.