AQSh Ukraina resurslari bo‘yicha bitim imzolashga tayyor, ammo Kiyev unga yangi o‘zgartirishlar kiritishga harakat qilmoqda.
Bu haqda AQSh moliya vaziri Skott Bessent AQSh prezidenti Donald Tramp vazirlar mahkamasining navbatdagi yig‘ilishida so‘zlagan nutqida ma’lum qildi.
"Ha, bizning tomonimiz imzo chekishga tayyor, biroq ukrainaliklar kecha kechqurun shoshilinch o‘zgarishlar qilishga qaror qilishdi", - deya jurnalistning bu boradagi savoliga Bessent javob berib, Vashington kelishuvni bugun imzolashga tayyorligini tushuntirdi.
Uning aniqlik kiritishicha, taklif qilingan kelishuvdan hech qanday band olib tashlanmagan. "Bu biz dam olish kunlari kelishib olgan shartnomamiz. Biz tomonda hech narsa o‘zgarmadi", dedi u.
Avvalroq, bosh vazirning birinchi o‘rinbosari Yuliya Sviridenko yaqin 24 soat ichida Vashington bilan yer osti boyliklari bo‘yicha kelishuv imzolanishini ma’lum qilgandi.