AQSh hukumati G‘azo sektoridagi “gumanitar pauza” tugaganidan keyin Isroilga harbiy yordam ko‘rsatishda davom etadi. Bu haqda Oq uy Milliy xavfsizlik kengashining strategik aloqalar bo‘yicha koordinatori Jon Kirbi ma’lum qildi.
"Biz, albatta, Isroilning HAMASga qarshi harakat qilish huquqi va majburiyatiga hali ham ishonamiz. Ular o‘zlarining harbiy yurishlari haqida gaplashdilar va bu tanaffuslardan keyin yana ularga (HAMASga) qarshi harakat qilish niyatida ekanliklarini ochiq aytishdi. Qachonki qaror qabul qilishsa, ular Qo‘shma Shtatlardan ularga kerak bo‘lgan imkoniyat va qurol tizimlari, shahar sharoitida urush haqida taklif qilishimiz mumkin bo‘lgan maslahatlarni olishda davom etadi”, dedi u.
Kirbining so‘zlariga ko‘ra, AQSh Prezidenti Jo Bayden Isroil rasmiylari bilan muloqotda Isroil Qo‘shma Shtatlardan yordam olishda davom etishlarini ta’kidlagan.
"Shunga qaramay, biz hozircha doimiy sulhni qo‘llab-quvvatlamaymiz. Biz gumanitar pauzalarni qo‘llab-quvvatlaymiz", deb qo‘shimcha qildi Oq uy rasmiysi.
Uning qayd etishicha, Vashington joriy pauzani uzaytirish tarafdori.