Pentagon Eron bilan urush davomida Amerika ob’ektlari zarar ko‘rganidan so‘ng qo‘shinlar va harbiy bazalarni g‘arbga ko‘chirish imkoniyatini ko‘rib chiqmoqda.
AQSh Mudofaa vazirligi davom etayotgan Eron urushi paytida Amerika ob’ektlariga yetkazilgan zararlardan so‘ng Fors ko‘rfazidagi harbiy ishtirokini qisqartirish imkoniyatini ko‘rib chiqmoqda. Bu haqda The Washington Post xabar berdi.
Nashr ma’lumotlariga ko‘ra, urush Vashington uchun mintaqada harbiy bazalarni saqlab qolish zaruratini qayta ko‘rib chiqish uchun «avlodda bir marta yuzaga keladigan noyob imkoniyat» yaratgan. Ko‘rib chiqilayotgan variantlardan biri zararlangan ob’ektlarni avvalgi ko‘rinishida qayta tiklamaslikni nazarda tutadi.
Yana bir variant AQSh qo‘shinlari va harbiy bazalarini g‘arbga — Iordaniya va Isroilni o‘z ichiga olgan mintaqaga ko‘chirishni nazarda tutadi. Urush davomida Amerika samolyotlariga yoqilg‘i quyuvchi havo kemalari Isroilda joylashtirilgan edi.
Nashr ta’kidlashicha, AQSh Mudofaa vaziri Pit Xegset hozircha mintaqadagi Amerika harbiy huzurini rasmiy ravishda qayta ko‘rib chiqish bo‘yicha topshiriq bermagan. Biroq bu masala Pentagonning siyosiy boshqarmasi va AQSh Markaziy qo‘mondonligi tomonidan o‘rganilmoqda.
Odatda Yaqin Sharqda 40 mingga yaqin amerikalik harbiy xizmatchi joylashtiriladi. AQShning eng yirik harbiy bazalari Fors ko‘rfazida joylashgan. Eron bilan urush boshlanganidan so‘ng Vashington mintaqadagi harbiy huzurini sezilarli darajada kuchaytirdi.
Urush davomida Fors ko‘rfazi davlatlari Eron tomonidan raketalar bilan hujumlarga uchradi. Bu hujumlar natijasida mintaqadagi Amerika harbiy ob’ektlariga ham zarar yetkazildi.
Jizzaxda bir sutkada 2 ta YTHda 5 kishi halok bo‘ldi
«Toliblar AQShni Afg‘onistondan chiqarib yuborgan edi, endi esa yana qaytishga chaqirmoqda» — The New York Times
«Yadroviy zarbaga — yadroviy javob»: Tehron Vashingtonni ogohlantirdi
