Andijonda paxta yig‘im-terim mavsumi oldidan ehson tadbiri o‘tkazildi

Andijon viloyatidagi klaster va fermer xo‘jaliklari yetishtirilgan paxta hosilini yig‘ib-terib olish mavsumini boshlash arafasida turishibdi. Bugun mavsum oldidan Andijon shahrida joylashgan Mirpo‘stin Ota ziyoratgohida ehson tadbiri o‘tkazildi. Bu haqda viloyat hokimligi matbuot xizmati xabar bermoqda.

Tadbirda viloyat hokimi Shuhratbek Abdurahmonov, mutasaddi rahbarlar, shahar-tuman hokimlari, qishloq xo‘jaligi sohasi faxriylari va xodimlari, diniy soha vakillari, nuroniylar hamda faollar ishtirok etdi.

Milliy boyligimiz bo‘lgan paxta hosilini nes-nobud qilmasdan, qisqa muddatlarda yig‘ib-terib olish, mavsumni uyushqoqlik bilan o‘tkazish, bunda barcha kuch va vositalarni safarbar qilish lozimligi ta’kidlandi.

Tadbir so‘ngida qur’on tilovat qilinib, yurt tinchligi, hosillar mo‘l-ko‘lchiligi, boshlanayotgan mavsumni xayrli o‘tishini so‘rab duoga qo‘l ochildi.