Alyaska — bu Putinning shaxsiy g‘alabasimi?

Vladimir Zelenskiy AQShda bo‘lib o‘tadigan Donald Tramp va Vladimir Putin uchrashuvini Rossiya yetakchisining “shaxsiy g‘alabasi” deb atadi.

Ukraina prezidenti ta’kidlashicha, Amerika hududida bo‘lib o‘tadigan uchrashuv Putinni “izolyasiyadan chiqaradi” va Tramp Moskvani urushni to‘xtatishga majbur qilmasa, kiritilishi kerak bo‘lgan yangi sanksiyalarni kechiktiradi.

Zelenskiy, shuningdek, AQShning maxsus vakili Stiv Uitkoffdan o‘t ochishni to‘xtatish bo‘yicha “birinchi signal” olganini ma’lum qildi, ammo tafsilotlarni ochiqlamadi.

Sammit shu juma kuni Alyaskada bo‘lib o‘tadi va bu Rossiya hamda AQSh prezidentlari o‘rtasidagi 2021 yildan buyon ilk uchrashuv bo‘ladi. Tramp Ukraina urushiga barham berishga umid qilmoqda va Moskva bilan ikki tomonlama aloqalarni yo‘lga qo‘ymoqchi.

Zelenskiy bu muzokaralarda ishtirok etmaydi — u hozircha taklif qilinmagan. Fransiyaning AFP axborot agentligiga bergan intervyusida Ukraina yetakchisi o‘z xavotirlarini bildirgan holda, Putin qattiq shartlar qo‘yishidan, Tramp esa Ukraina hududlarini berish evaziga kelishuvga rozi bo‘lishidan xavotirda ekanini tan oldi.

“Biz Donbassdan chiqmaymiz. Agar biz bugun balandliklar va mustahkamlangan joylarni tark etsak, ruslarga yangi hujum uchun poydevor yaratib beramiz”, — dedi Ukraina prezidenti.

Sammitga tayyorgarlik ishlari allaqachon boshlangan. Rossiya tashqi ishlar vaziri Sergey Lavrov AQSh davlat kotibi Marko Rubio bilan bo‘lajak uchrashuvning borishini muhokama qildi. Tramp vakili Kerolayn Levittning aytishicha, sammitning asosiy maqsadi — “urushni qanday tugatish mumkinligini tushunish”.

Bu orada frontda rossiyaliklar Dobropolye yaqinida 10 km oldinga siljishdi va Pokrovsk tomonidagi uchta yo‘nalishda yangi hujumlarga tayyorgarlik ko‘rmoqda. Bu hudud Donbassdagi asosiy strategik va logistika markazi hisoblanadi, Rossiya uni yarim yildan beri egallashga urinayotgan edi.

Urushgacha 30 ming aholiga ega bo‘lgan Dobropolye muntazam ravishda dron hujumlariga uchramoqda. Hujum xavfi vayron bo‘lgan Konstantinovkaga ham tahdid solmoqda — bu Donesk viloyatida Kiyev nazoratida qolgan so‘nggi yirik shaharlardan biridir.