1500 ishtirokchi, yangi kelishuvlar va milliardlab loyihalar — Samarqandda O‘zbekiston–Xitoy forumi bo‘lib o‘tadi

1-2 iyun kunlari Samarqanddagi “Silk Road Samarkand” xalqaro turizm markazida ikkinchi O‘zbekiston-Xitoy hududlararo forumi bo‘lib o‘tadi. Bu haqda Investisiyalar, sanoat va savdo vazirligi xabar berdi.

Tadbir ikki mamlakat o‘rtasidagi strategik sheriklikni mustahkamlash, hududlararo hamkorlikni rivojlantirish hamda sarmoya va ishbilarmonlik aloqalarini kengaytirishga qaratilgan.

“Forumda 1500 nafardan ortiq ishtirokchi, jumladan, ikki mamlakat ishbilarmon doiralari, hukumatlar, viloyatlar hokimliklari, shuningdek, fan va ta’lim muassasalari vakillari ishtirok etadi”, — deyiladi xabarda.

Forum doirasida qator kelishuvlar imzolanishi va yangi investisiya loyihalarini ishga tushirish rejalashtirilgan.

Xabarga ko‘ra, forum O‘zbekiston hududlari va Xitoy provinsiyalari o‘rtasidagi har tomonlama sheriklikni mustahkamlashda muhim qadam.