Bugun Tramp Suriyaga qarshi sanksiyalarni yumshatish haqidagi farmonni imzolaydi

AQSh prezidenti Donald Tramp kun davomida AQShning Suriyaga qarshi sanksiyalarini yumshatish haqidagi farmonni imzolaydi.

Bu haqda CBS telekanalining Oq uyda akkreditasiyadan o‘tgan muxbiri Jennifer Jeykobs ma’lum qildi.

"Bugun Tramp Suriyaga qarshi sanksiyalarni yumshatish to‘g‘risidagi farmonni imzolaydi", — deb yozdi u "X" ijtimoiy tarmog‘ida.

Eslatib o‘tamiz, 4 may kuni Tramp Ar-Riyodda Suriya muvaqqat rahbari Ahmad al-Shara bilan muzokaralar o‘tkazgan va bu ikki davlat rahbarlarining so‘nggi 25 yildagi ilk uchrashuvi bo‘lgandi. Amerika rahbari Vashington Hofiz Asad va uning o‘g‘li Bashar Asad hukmronligi davrida Damashqqa o‘nlab yillar davomida qo‘yilgan cheklovlarni bekor qilishni boshlashini ma’lum qildi.