Fransiyada terakt rejalashtirgan 17 yoshli o‘smir hibsga olindi

Fransiya polisiyasi 17 yoshli fransuzni teraktga tayyorgarlik ko‘rganlikda gumon qilib qo‘lga oldi.

Bu haqda Fransiya ichki ishlar vaziri Bruno Retayo LCI telekanalida ma’lum qilgan.

"O‘tgan juma kuni Sart departamentida 17 yoshli o‘smir qo‘lga olindi. U terrorchilik hujumlarini, xususan, sinagogalar, seks-shop va bayram tadbirlarini amalga oshirishni rejalashtirgan", — dedi vazir. Uning qo‘shimcha qilishicha, o‘smir rejalashtirish bosqichida qo‘lga olingan, ammo jinoyatni bevosita sodir etishga tayyorgarlik ko‘rish bosqichida emas.

Retayo mamlakatda terrorchilik tahdidi kuchayishda davom etayotgani haqidagi fikrni bildirdi, buni hozirgi holat tasdiqlaydi. Uning so‘zlariga ko‘ra, ayniqsa, AQSh va Isroilning Eronga qarshi amaliyotlari munosabati bilan sunniy va shia e’tiqodidagi radikallarning sa’y-harakatlarini birlashtirish xavfi ham mavjud.