Venesuela prezidenti Buyuk Britaniya bosh vazirini aqldan ozgan deb atadi

Venesuela prezidenti Nikolas Maduro Buyuk Britaniya bosh vaziri Kir Starmerning urushga tayyorgarlik haqidagi bayonotini aqldan ozgan deb atadi va Yevropada urushga qarshi harakat yaratishni taklif qildi. Bu haqda siyosatchi Venezolana de Televisión telekanalidagi "Maduro bilan+" ko‘rsatuvi efirida aytib o‘tdi.

"Men Britaniya xalqini, London aholisini, Liverpulni va Britaniyaning barcha qismlarini o‘z Bosh vazirining urushga chaqirgan bu umidsiz va aqldan ozgan chaqirig‘iga javob berishga chaqiraman", dedi u.

Bundan tashqari, Maduro bunday takliflar birinchi navbatda o‘z ta’sirini yo‘qotgan Yevropa elitasidan kelayotganini ta’kidladi. Siyosatchining fikricha, davlatlar o‘rtasidagi mojarolar uchun qurol ishlab chiqarishdan pul topadigan biznes ham muhim o‘yinchi hisoblanadi.

"Menimcha, Kir Starmer butunlay tanazzulga uchragan, eskirgan elita va ular qurol ishlab chiqarish bilan shug‘ullanadigan biznes nomidan gapiradi", dedi Maduro.

Venesuela rahbari Yevropa davlatlariga Britaniya bosh vaziri chaqirayotgan urushga qarshi kuchli ijtimoiy, xalqchil, antimilitarist harakatni yaratishga chaqirdi.

Eslatib o‘tamiz, 2 iyun kuni Kir Starmer Britaniya yangi mudofaa strategiyasiga ko‘ra, "urushga tayyorlik" rejimiga o‘tayotganini e’lon qilgan edi. Keyin u mamlakat qurolli kuchlariga "urush tezligida" innovasiyalarni joriy etish niyatida ekanini ta’kidladi.