Har kuni Telegramga 2 yarim million yangi foydalanuvchi qo‘shiladi — Pavel Durov

Telegram yaratuvchisi Pavel Durov messenjer har kuni 2,5 milliondan ortiq yangi foydalanuvchilarni jalb qilishi haqidagi statistikani e’lon qildi. Bu haqda Hudud24.uz xabar berdi.

“Har kuni Telegramda 2,5 milliondan ortiq yangi foydalanuvchi ro‘yxatdan o‘tadi, joriy yil boshida esa oylik faol foydalanuvchilarning soni 800 milliondan oshdi”, — deb yozdi Durov Telegramdagi kanalida.

O‘z mavqeini mustahkamlash va tez o‘sish sur’atlarini saqlab qolish uchun kompaniya 270 million dollarga yaqin obligasiyalar chiqardi. Emissiyada katta obro‘ga ega bo‘lgan taniqli fondlar ishtirok etdi. Durov yangi obligasiyalarning chorak qismini sotib oldi va kompaniya o‘sishiga o‘n millionlab sarmoya kiritdi. Bu uning so‘nggi 10 yil davomida Telegram uchun sarflagan yuzlab millionlariga qo‘shimcha bo‘ldi.

“Ba’zilar buning o‘rniga uy yoki samolyot sotib olish mumkin edi, deb o‘ylashadi. Lekin men hech narsaga egalik qilmasdan (oz miqdorda Bitcoin va Toncoindan tashqari) o‘z ishimga e’tibor qaratishni afzal ko‘raman”, — deydi Pavel Durov.

O‘tgan yili kompaniya monetizasiya jarayonini muvaffaqiyatli boshladi. Durovning ta’kidlashicha, Telegram hali rentabellik darajasiga chiqmagan bo‘lsada (bu monetizasiyaning ikkinchi yilida kutilmoqda), u Twitter va Snapchat kabi raqobatchilariga qaraganda mutlaq ko‘rsatkichlarda rentabellikka yaqinroq.

O‘tgan yozda Telegram pullik obuna — Telegram Premiumni joriy qilgan edi. Yil oxiriga kelib Premium obunachilari soni 1 milliondan oshdi, dedi Durov.

Butun dunyo bo‘ylab yuz millionlab odamlar foydalanuvchilar manfaatlarini birinchi o‘ringa qo‘yadigan mustaqil xabar almashish platformasini qidirib, Telegramni tanladi. Messenjer asoschisi uchun bu shunchaki biznes emas, bu uning hayotdagi oliy maqsadi – o‘z missiyasiga sodiq qolgan holda ushbu platformani rivojlantirishda davom etish.