Зеленский ўз идорасининг собиқ маслаҳатчиси Алексей Арестовичга нисбатан санкциялар жорий этди.
Украина президенти Владимир Зеленский Миллий хавфсизлик ва мудофаа кенгашининг бир қатор жамоат арбоблари, жумладан, президент девони раҳбарининг собиқ маслаҳатчиси Алексей Арестович, сиёсатшунос Костянтин Бондаренко ва блогер Мирослав Олешкога нисбатан шахсий санкция қўллаш ҳақидаги қарорини кучга киритди. Санкциялар шахсий ҳисоблар, молиявий операциялар ва бошқаларга оид.
Алексей Арестович 2023 йил январида Youtubeʼдаги “Фейгин Live” каналида Днепрдаги уйнинг бир қисмини вайрон қилган ракета Украина ҳаво ҳужумидан мудофаа кучлари томонидан уриб туширилгани, кўп қаватли бино устига қулагани ва портлагани ҳақида айтганидан сўнг Зеленский идораси маслаҳатчиси лавозимидан кетган эди.
Истеъфога чиққанидан кейин Арестович мамлакатни тарк этди ва Зеленскийнинг энг ашаддий танқидчиларидан бирига айланди.
Украинада ҳозирда хорижда бўлган Арестовичга қарши иккита жиноий иш қўзғатилди: жиноий ҳуқуқбузарлик ҳақида ёлғон хабар бериш (Украина Жиноят кодексининг 383-моддаси 1-қисми) ва зўравонлик ва шафқатсизлик, ирқий, миллий ёки диний муросасизлик ва камситишни тарғиб қилиш (Украина кодексининг 30-моддаси).
Унга нисбатан Россия ва Беларусда ҳам жиноий ишлар очилган.
