Зеленский курашни давом эттиришга тайёр: "Ёмон келишувдан кўра, келишувсиз бўлган яхшироқ"

Агар урушни тугатиш учун яхши келишувга эришишнинг иложи бўлмаса, Украина Россия билан курашишни давом эттиришга тайёр.

Украина раҳбари Владимир Зеленский бу ҳақда The Atlantic нашрига берган интервьюсида маълум қилди.

Нашрнинг ёзишича, президентнинг яқин доирасининг баъзи аъзолари Украина ва Россия ўртасида тинчлик битими учун имкониятлар ойнаси ёпилиб бораётганидан хавотирда. Уларнинг фикрича, агар бу баҳорда урушни тугатиш бўйича келишувга эришилмаса, Киев йиллар давомида жанг қилиши мумкин.

Ўз навбатида, Зеленский The Atlantic нашрига берган интервьюсида ўз халқини ёмон келишувни қабул қилишга мажбурлашдан кўра, келишувни бутунлай рад этишни афзал кўришини таъкидлади. Украина президенти шунингдек, тўрт йиллик тўлиқ кўламли урушдан сўнг курашни давом эттиришга тайёр эканлигига ишонтирди. "Украина ютқазмаяпти", деди у жанг майдонидаги вазият ҳақида изоҳ берар экан.

Украина раҳбари шунингдек, АҚШ президенти Дональд Трампнинг Россия-Украина урушини тугатишга қаратилган саъй-ҳаракатлари ҳақида ҳам фикр билдирди.

"Трамп учун Россия ва Украина ўртасидаги урушни тўхтатишдан кўра буюкроқ ғалаба йўқ. Бу унинг мероси учун энг муҳим устувор вазифа. Трампнинг энг яхши имконияти - буни [2026 йил ноябрь ойида бўлиб ўтадиган] оралиқ сайловлардан олдин амалга ошириш”, деди Зеленский. “Ҳа, у камроқ ўлимни хоҳлайди. Лекин, аниқроғи, бу унинг учун шунчаки ғалаба, сиёсий ғалаба.”