Зеленский илк бор кастюм кийди

Украина президенти Владимир Зеленский Нидерландияда ўтказилган расмий кечки овқат маросимида биринчи марта уруш бошланганидан бери қатъий сиёсий кўринишда — қора классик кастюмда намоён бўлди. Бу воқеа Оқ уйдаги танқидлардан кейин рўй берди, у ерда уни иш услубига мос кийимда эмаслиги учун танқид қилишган эди.

Ушбу кечки қабул НАТО саммити доирасида ташкил этилган бўлиб, Нидерландия қироли Виллем-Александр ва қироличаси Максима томонидан Ден Босх саройида ўтказилди. Қатнашчи мамлакатлар етакчилари турмуш ўртоқлари билан келган, аммо журналистларнинг эътиборини фақат тадбирнинг ўзи эмас, балки Зеленскийнинг ташқи кўриниши ҳам жалб қилди.

Жорий йил март ойида, Зеленский Вашингтонга ташрифи чоғида Овал офисида ўтказилган учрашувда оммавий танқидга учраган эди. Бир журналист ундан:

«Нима учун сиз кастюм киймайсиз? Умуман олганда, сизда кастюм борми?» — деб сўраган.
Президент Дональд Трамп ва унинг ўринбосари Жей Ди Ванс бу саволга кулишган.

Зеленский эса ўзини йўқотмаган ҳолда жавоб берган:

«Бу билан муаммоингиз борми? Мен урушда ғалаба қозониб бўлгач кастюм киаман — балки сизнинг кастюмингиздан ҳам яхшироғини».

Бу галги чиқишда Зеленскийнинг кийими аввалги имижига мос келмади: қора пиджак, қора рубашка, галстуксиз, қора туфлилар. Россия–Украина уруши 2022 йил февралида бошланганидан буён бу унинг биринчи марта расмий пиджакда чиқишидир.

Уруш бошидан бери Зеленский расмий кастюм ўрнига одатда Украина герби туширилган тўқ рангли футболка, ёки ҳарбий курткада кўринаётган эди.

Гаагадаги саммит доирасида Зеленский Дональд Трамп билан учрашиши кутилмоқда. Президент девони раҳбари Андрей Ермак маълум қилишича, музокараларда қуйидаги масалалар кўрилади:

• Уруш ҳолати ва Украина позицияси

• Қурол етказиб бериш

• Россияга қарши санкциялар

Ермак таъкидлаган:

«Куч орқали тинчлик» — бу Москва ҳаракатларини тўхтатишнинг ягона йўли.

Украина разведкаси сўнгги ойларда огоҳлантирмоқда: Россия ёзги ҳужум доирасида Сум ва Днепропетровск вилоятларини босиб олишга уриниши мумкин. Россия президенти Владимир Путин ҳам бу режаларни тасдиқлаб, Россия чегарасида буфер ҳудуд яратиш зарурлигини айтган.