Зеленский: Асирлар алмашинувидан сўнг Умеров Мединскийга қўнғироқ қилган, лекин кутилаётган натижа бўлмади

Украина президенти Владимир Зеленскийнинг маълум қилишича, Россия билан сўнгги катта асирлар алмашинувидан кейин Киев томони отишмаларни тўхтатиш ва етакчилар учрашуви бўйича режалар эълон қилинишини кутган.

> 💬 «Биз ростдан ҳам улар томондан “адженда” — яъни отишмаларни тўхтатиш ҳамда етакчилар учрашувини ўтказиш бўйича режа тақдим этилишини кутгандик. Буни асирлар алмашинувидан олдин ҳам ваъда қилишган эди. Кейин эса, гўёки, меморандум алмашинувдан сўнг тақдим этилади дейишди. Лекин... ҳеч нарса олмадик», — деди Зеленский Берлинда, Германия канцлери Фридрих Мерц билан ўтказилган қўшма матбуот анжуманида.

--- Мудофаа вазири — Мединский билан алоқа қилган

> 💬 «Биз россияликлар билан алоқага чиқдик — Украина мудофаа вазири жаноб Мединскийга қўнғироқ қилди. Улар “Бўлади, бўлади”, деб жавоб беришди. Аммо натижа бўлмади. Ҳеч ким кутганини олмади. Биз АҚШга мурожаат қилдик — улар ҳам жавоб кутяпти. Ҳамма кутмоқда. Эҳтимол, энди кутиш арзимас, жиддийроқ чоралар кўриш керак», — дея Зеленский сўзларини келтиради "Украинская правда" нашри.

Кремль нега жавоб бермаяпти?

ТАСС агентлиги ёзишича, Кремль вакили Дмитрий Песков чоршанба куни қилган баёнотида, Россия ва Украина томонидан тайёрланаётган меморандум лойиҳалари яқин кунларда эълон қилиниши кутилаётганини билдирган. Шундан сўнг янги музокаралар раунди муҳокама этилиши мумкин.