Юмшамаган позиция: Украина-Россия уруши 2027 йилгача давом этади

Украина-Россия уруши 2027 йилгача давом этади. Путин ўз позициясини юмшатиш аломатларини кўрсатмаяпти — Bloomberg.

АҚШ ва Европа расмийлари Трамп маъмуриятининг сўнгги тинчлик ташаббуси Россия президенти Владимир Путин билан музокараларда ҳеч қандай натижа бермаганини тан олиб, Россиянинг Украинага қарши уруши келгуси йилда ҳам давом этади деган хулосага келди. Вазиятдан хабардор европалик амалдорларнинг Bloomberg'га маълум қилишича, Россия президенти Украинага қарши уруш ва Киев иттифоқчиларининг қатъиятини синаб кўриш учун қиш давомида ҳужумларни кучайтиришни режалаштирмоқда.

"Президент Доналд Трампнинг махсус вакиллари Жаред Кушнер ва Стив Уиткофф Москва ва Киевда бўлиб ўтган музокараларда сезиларли ютуқларга эриша олмадилар", — деди агентлик манбалари.

Расмийларнинг таъкидлашича, АҚШ яқинда Москвага боши берк кўчага кириб қолган тинчлик музокараларини қайта бошлаш учун янги ғоялар зарурлиги ҳақида хабар берганига қарамай, Путин ўз позициясини юмшатиш аломатларини кўрсатмаган.

Ўз навбатида, Bloomberg суҳбатдошларидан бири Россиянинг келгуси олти ойлик режаси тинч аҳоли ҳаётини чидаб бўлмас ҳолатга келтириш учун Украинанинг энергетика ва иссиқлик инфратузилмасига ҳужумларни кучайтириш, шунингдек, Киевни қўллаб-қувватлашга путур етказиш учун Европада гибрид ҳужумлар ва сиёсий аралашувларни оширишдан иборат эканлигини билдирди.

Нашр манбаларининг таъкидлашича, АҚШ, Россия ва Украина вакиллари ўртасидаги уч томонлама музокаралар Давлат Думасига сайловдан кейин қайта бошланиши мумкин, аммо бундай муҳокамалар тинчлик битими тузиш жараёнига сезиларли таъсир кўрсатиши даргумон.