Йил охиригача Теҳрон яшаш учун яроқсиз ҳолга келиши мумкин

Эрон президенти Масъуд Пезешкиённинг маълум қилишича, Теҳрон шаҳридаги сув омборларининг сатҳи сўнгги 60 йил ичида энг паст даражага тушган. Бу ҳолат сув таъминотининг кескин танқислигини ва инфратузилманинг заифлигини кўрсатмоқда.

Теҳрон шаҳрида кечалари сув таъминоти вақтинча тўхтатила бошланди, айрим туманларда бу чекловлар аллақачон жорий этилган. Сув омборларидаги захира баъзи ҳудудларда 10 фоиздан кам қолган, бу эса нафақат ичимлик суви, балки гидроэлектростанциялар фаолиятини ҳам издан чиқаришга олиб келган. Теҳрон аҳолиси сўнгги олти йил давом этаётган қурғоқчилик оқибатларини ҳар йил сездириб борилаётганини таъкидламоқда.

Шаҳид Аббоспур номидаги Сув ва энергетика университети бўлим бошлиғи Али Моридининг фикрича, сув инқирози фақат иқлим ўзгариши билан боғлиқ эмас. Унинг таъкидлашича, бу ҳолат илмий огоҳлантиришларга эътибор берилмагани, ҳамкорликнинг йўқлиги ва ресурсларни нотўғри бошқариш натижасида юзага келган.

Агар йил охиригача ёмғирлар ёқмаса, Теҳрон ва унинг атрофидаги марказий ҳудудлар яшаш учун яроқсиз ҳолга келиши мумкин. Ер ости сувларининг камайиши ва тупроқ шўрланиши сабабли, қишлоқ аҳолиси шаҳарларга кўчиб кетмоқда. Бу эса шаҳарларда тартибсиз урбанизация ва ижтимоий муаммоларнинг кучайишига сабаб бўлмоқда.

Эрон сув ресурсларининг 80 фоизидан ортиғини қишлоқ хўжалигига сарфлайди. Бу ҳолат деҳқонлар ҳаётига катта зарар етказмоқда, марказий вилоятлардаги сув омборлари қурғоқчилик туфайли эндиликда ишлатилмайди.

Энергетика вазири Аббос Али Ободий аҳолини сувни ванналарда захира қилишга чақирган. Президент Пезешкиён эса агар вазият ўзгармаса, Теҳрон аҳолисини вақтинча кўчириш мумкинлигини айтган. Ҳозирча кўчириш қандай амалга оширилиши ҳақида аниқ маълумот берилмаган.

Эрон Сув хўжалиги федерацияси раҳбари Ризо Ҳожи Каримнинг сўзларига кўра, бу инқирознинг илдизи илмий огоҳлантиришларга эътибор берилмагани, иқлим ўзгариши ва ер ости сувларининг камайиши билан боғлиқ.
“Биз сувни тугамайдиган ресурс деб билдик, аммо энди ҳақиқат бизга ўзини мажбурлаб сездирмоқда”, — дейди Карим.